Rooftop Republic:邊個話耕田冇「錢」途!?

撰文:Wantedly編集部

唔知大家係咪同筆者一樣,細細個成日都聽到屋企人講:「你唔畀心機讀書,第時大個就要耕田㗎啦!」但偏偏Rooftop Republic(下稱Rooftop)呢間社企就想同大家講,耕田唔單只有「錢」途,仲可以拯救下一代、拯救世界。

Rooftop Republic做嘅其實係都市耕種(urban farming),除咗幫唔同嘅公司提供「一條龍」服務之外,仲會搞唔同嘅workshop畀公眾,實行「全民大耕作」!

但點解佢哋會喺呢個「土地問題」咁嚴重嘅香港搞呢壇嘢呢?其中一位Co-founder Michelle話:「雖然香港好細,但其實成個香港加埋嘅天台面積係有六千萬呎(超過一千個足球場咁大),而暫時有恆常運作嘅天台佔咗1%都冇。」Rooftop Republic就因而命名。

(筆者即刻喺度諗,唔知六千萬呎解唔解決到香港嘅住屋問題呢?)

▲聽筆者side-track完,搵Assistant Project Manager – Angelica傾吓先~

打工要對得住自己

對於喺新加坡出世、香港長大、再接受西方教育嘅Angelica嚟講,耕種從來都唔係一件差嘅事,反而喺細個嘅時候就已經係佢成長嘅一部分:

「由細到大屋企人都會講好多環保嘅嘢,例如我哋有啲咩可以畀返地球,點樣生活可以sustainable啲,婆婆以前仲會借鄰居個花園去種啲農作物,所以我諗屋企人對我揀嘅呢條路有好大影響。」

再加上Angelica本身讀Environmental Science,佢就話當見到個世界嘅環境問題咁嚴重,就更加唔想好似好多人一樣,一直剝奪緊下一代嘅資源。所以就決定嘗試去影響個社會,希望下一代有更大嘅生存空間。

「我一路都覺得返工唔應該係純粹為錢咁簡單,仲要對得住自己嘅想法。所以我最鍾意Rooftop嘅係佢會做好多educational嘅工作,真係會嘗試改變個社會。」

呢個時候Angelica仲諗返起一個好得意嘅例子:

「有次我帶school tour去農場,有個小朋友同我講:『啲農夫一定好懶啦,佢哋淨係要播吓種就等收成,都唔使做嘅。』之後過咗半日,我就去睇吓個小朋友點啦,佢一路抹汗一路話:『好攰呀…原來農夫咁辛苦㗎?我收返我之前講嘅嘢啦,對唔住呀……』喺呢啲位你就會覺得,你真係教育緊身邊嘅人,感受到自己嘅impact。」

▲喺呢個時候,不如又問吓有過10年communications experience嘅Michelle點解要嚟香港搞呢間公司?

「剛剛遇著啱啱」

Michelle係一個土生土長嘅新加坡人,明明喺廣告、marketing做得穩穩定定,點解會選擇嚟香港,仲要搞社企呢?

「因為嗰陣時覺得自己喺新加坡已經住咗好耐,好似冇乜新嘅刺激咁,於是就想離開吓,去咗好幾個亞洲城市,咁啱香港又有個工作機會,老公又係香港人,所以就嚟咗香港發展。」

到咗香港之後,佢冇一嚟就選擇住喺港島,反而想「貼地」啲,住吓九龍同新界,而喺新界住嘅時候,佢就開始接觸到香港嘅大自然:

「嗰陣仲租咗塊田返嚟,想種自己嘅嘢食,而唔係買出面用好多農藥、對環境有破壞嘅農作物返嚟,但之後發現自己得個weekend去搞,其實係冇乜可能做到,於是就開始諗有咩解決方法。」

所以Michelle同兩位co-founder就開始做功課,發現原來香港有98%嘅蔬果都係import,而香港同時間亦都有好多天台冇人用,所以就決定將urban farming呢件事變做個business model,再希望將呢件事慢慢變成大家嘅生活習慣。

▲你睇佢哋就知道,耕田唔單只搵到錢,仲可以好開心㗎~(照片由Rooftop Republic提供)

搵錢都可以好有意義!

理想還理想,生意都係要做嘅,咁Rooftop而家個生意又做成點呢?原來佢哋條team由原本得3位co-founder,去到而家已經有十幾個同事;而且佢哋嘅生意已經慢慢由香港,發展到去其他唔同嘅城市。

其中一個例子係,原來好多企業都搵咗佢哋,將自己嘅大廈天台變成農場,等一班同事學吓urban farming之餘,又可以多啲了解環境問題。

Michelle仲記得有一次佢去帶工作坊嘅feedback:

「嗰陣好多人都話『好辛苦呀』、『我哋個天台仔都做到咁,啲農夫點算呀?』,所以除咗畀佢哋體會到有機耕種個困難同成果之外,仲好直接咁感受到佢哋想法開始唔同咗,甚至將urban farming呢件事帶返去自己屋企,變成自己嘅lifestyle。」

唔知Michelle佢哋有冇咁諗過,但筆者覺得Rooftop本身就好似一粒種子咁,「妄想」將urban farming種喺每一個天台、甚至係每個香港人嘅生活。只要繼續默默耕耘,大家都總有一日會搵到自己嘅「收成期」。

後記:唔講唔知,其實Rooftop Republic嘅中文名係「雲耕一族」,問到Michelle個translation點嚟嘅時候,佢就話原來係另一個co-founder Andrew改嘅:「嗰陣好似係覺得如果直譯嘅話會好奇怪,於是就諗,喺天台種嘢都幾近啲雲呀,同埋其實你調轉『雲耕』就會變返做『耕耘』,成件事好似poetic啲咁。」筆者聽完之後覺得,Rooftop呢間公司就係一班浪漫嘅人做緊實際嘅事,唔知大家又點諗呢?

你哋又想一齊耕吓田?👩🏽‍🌾👨🏽‍🌾

Rooftop Republic 's job postings
2 Likes
2 Likes