1
/
5

都市感情實錄 ─ Programmer(下)

「對唔住,你返嚟啦好唔好?最多我以後打少啲機啦。」David再send多個message畀Cally。然後就繼續一邊打機,一邊等佢覆。

如是者,Cally成晚都冇覆過佢,而佢都唔打算再打畀Cally,對佢嚟講,呢個係佢喘息嘅空間,佢可以肆無忌憚咁打機,鍾意做乜就做乜。

「早晨呀b,你起咗身未呀?」David第二朝再send多個message畀佢。

好多人都覺得只要扮冇事,件事就會冇發生過,又或者個問題會自己消失,但其實大家都只係唔想面對或懶得解決,而David都唔例外。

由唔知幾時開始,佢好似當咗Cally係自己面前啲code咁,當佢砌好哂所有嘢之後, test吓就知有啲咩bug要fix,但Cally直到而家都冇覆過佢,佢好似第一次解釋唔到眼前嘅code咁,要fix啲咩,點改code都無從入手。

David決定要請半日假,去Cally公司樓下接佢放工,仲特登買咗佢最鍾意嘅泡芙等佢,但佢一路等,就一路諗:點解咁耐都未收工嘅?於是,佢又拎咗部手機出嚟玩,因為佢係一個好討厭「空轉」嘅人。

Cally落樓之後,傾咗個電話就上咗去平台,行去灣仔碼頭搭船過尖沙嘴,佢留意唔到原來David喺對面公園等緊佢,而David都好理所當然地跳緊降落傘,忙住執槍同搵子彈。

當佢玩完呢場之後,發現原來玩玩吓已經去到八點幾,佢覺得唔對路,於是打咗個電話畀Cally:「你未收工咩?」

「走咗一陣,過緊去尖沙嘴搵Candy食飯。」Cally答。

「走咗?你走做咩唔同我講?你而家喺邊?你知唔知我喺你樓下等咗幾耐呀?」David好嬲,佢冇諗過自己做咗咁多嘢,到頭來都係白費心機。

Cally唔知畀咩反應好,一開始根本就係因為David掛住打機唔理佢,所以佢先咁嬲咁失望,而家反而俾David怪返轉頭,成件事就好似「blame the victim」咁。

「對唔住,我唔知你喺樓下等緊我,但如果你喺樓下點會見我唔到?我喺樓下同Candy傾咗個電話,諗好咗去邊先離開公司。」

其實Cally都唔知自己點解要講對唔住,或者喺呢段關係裡面佢做咩都唔啱:拎走佢電話係錯、搵朋友食飯係錯、遲收工都係錯。

「咁我打住機等你吖嘛,邊望得咁多啫,玩玩吓又唔知時間喎,咪而家先打畀你囉。你而家喺邊呀?我過嚟搵你好唔好?」David有啲心虛咁問。

「打機,又係打機。我唔係介意你打機呀,我只係唔想你同我一齊嘅時候都淨係掛住打機,你等我收工又喺度打機,玩到連抬起個頭嘅時間都冇。就連同我講嘢你都要望住個電話,不如你同部電話一齊啦。」Cally覺得好委屈咁講。「就連尋晚餐飯你都係咁,你知唔知間餐廳我搵咗幾耐?究竟你有冇著緊過我?我真係好攰啦…唔好再搵我啦好嗎?我哋都唔好再聯絡啦。」

「唔好上船,你等我。」David由急步行開始加快速度,佢好似終於意識到事情有幾嚴重,而佢再唔追就呢世都唔會再追到。佢沿住平台跑,但人已經多到佢連跑嘅空間都冇。

當佢橫跨會展站上面條天橋嘅時候,佢見到架船已經慢慢離開緊灣仔,電話另一端原來一早就收咗線,而碼頭都冇Cally嘅身影。佢亦都冇機會再上返呢班船。


圖片來源:《春嬌救志明》

上回 ⏪

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Wantedly, Inc. (Hong Kong)'s job postings
If this story triggered your interest, go ahead and visit them to learn more