【二O十九求職百科】③要份bonus包利是,定要好工過人世?

仲有兩個禮拜就要迎接農曆新年,除咗包/收利是之外,仲嚟到出bonus嘅時間,而根據筆者嘅非正式統計,全港約95%工作人口每個禮拜都有辭職嘅念頭,而當中99%嘅受訪者唔願走嘅原因正正係捨不得份bonus。

筆者身邊亦有朋友如是,結果佢到今時今日仲留緊喺佢厭惡嘅公司,過住機械人一樣嘅日子,到頭來係我地敵唔過現實,定係冇「出走」嘅勇氣?

心態決定境界

常言道:「錢唔係萬能,但冇錢就萬萬不能。」但若然心態一直都係:「喺公司辛苦咗咁耐,唔拎埋份bonus咪好唔抵?」或者只會萬劫不復。

根據香港人力資源管理學會嘅調查,今年嘅打工仔平均會收到大約一個月糧嘅花紅。換言之,好多人就係因為呢一個月嘅糧,而繼續留喺一間自己唔喜歡嘅公司「苦幹」,值得咩?

當然,如果你月入拍得住因為「責任感」而留任港鐵嘅馬時亨主席的話,又真係要商榷一下嘅。

但無論如何,只要你一出到嚟呢個社會,你返工嘅時間就會佔人生嘅大半,每日都只係返工等放工,日復一日。假如你唔喜歡自己嘅工作,每日就只會越嚟越唔知自己做緊咩。

筆者當初剛出嚟做嘢嘅時候,打緊一份令自己成為齒輪嘅工,每日返到去都係對住部電腦,做重重覆覆嘅事,除咗成為香港經濟嘅一粒星塵之外,完全冇任何value added。直至有一日坐咗喺office度,忽然間就喊咗出嚟。

或者呢個係比較極端嘅例子,但相信大家都有試過返工返到不知所謂嘅感覺,因為你根本搵唔到自己嘅價值喺邊度,而你嘅存在就只係令到間公司可以如常運作。

打工有「價」

價值之所在除咗最表面嘅銀碼之外,仲有個人本身存在嘅意義。而家想同大家分享嘅並唔係存在主義(對哲學有興趣嘅朋友可以了解吓),而係單純地講緊究竟喺一間公司裡面,搵唔搵到自己嘅重要性,得唔得到想要嘅滿足感。

出咗嚟做嘢先知道,原來當年喺大學「上莊」比起返工更有意義同成功感,由一開始「揼」year plan,再完成一個又一個活動,嗰種攰得值得嘅滿足已經好耐都冇出現過。

而剩低嘅,就只係每日收工有一種畀人揸乾咗嘅感覺,一滴不漏。返到屋企就只會攤咗係度,所有嘢都唔想做,唯一賺到嘅,就只係嗰份一年一次嘅bonus。

搵錢固然重要,但試諗吓,若然你未來嘅人生只係每一個月望住本「紅簿仔」,數住啲「零頭」,就真係會變成《數字人生》。

而筆者都相信大家唔希望將來會成為,或者見到通街都係「30624700」或「689」。

🤓【二O十九求職百科】大全 🤓

睇吓有咩好工啱你啦 👇🏼

成立於2010年,Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來,取代重視利益關係的傳統配對。在日本有超過30,000間公司使用Wantedly,每月活躍用戶達到120萬個。我們的服務已拓展至新加坡,現在更進駐香港!
Wantedly, Inc. (Hong Kong)'s job postings
Anonymous
Anonymous

Weekly ranking

Show other rankings

Page top icon