想第一時間知道Hong Kong Broadband Network幾時請人？即刻click呢度再follow佢哋啦！

小編今次就搵嚟香港寬頻（HKBN）同大家分享吓一份唔需要Degree、平日被大家忽略咗、但其實好多機會嘅職業 — Service Technician 服務技術員。

「服務技術員做咩㗎？」

服務技術員有個耳熟能詳嘅稱號，冇錯就係「拉線師傅」喇。唔好以為做「拉線」，就真係駁條線咁簡單呀，真係咁容易嘅⋯⋯你自己整咪得囉係咪先？

技術服務經理Jacky Lo話為咗提升員工喺客戶服務、技術同埋產品嘅知識水平，香港寬頻嘅所有師傅都要接受「CPE (Certified Professional Engineer) 專業認證計劃」嘅評核先至能夠成為認證嘅專業技術人員。呢個認證有幾巴閉？咪就係行內唯一一間獲得香港管理專業協會「最佳管理培訓及發展獎」金獎的認證課程囉。喺計劃期間，師傅仲可以清楚咁了解自己嘅強弱項，從而重點提升個別技能，同埋幫助佢哋喺團隊入面搵到最啱自己嘅位置～

「份工就係拉線咁簡單？有咩其他嘢學？」

雖然好多公司都係入屋駁完條寬頻線就收工，但香港寬頻就希望喺專業技術之外做多少少，為客人帶嚟更加優質嘅體驗之餘，亦俾前線員工學多啲、識多啲嘢。例如拉完線之後，師傅會主動了解客戶嘅上網習慣，睇下有冇其他合適嘅產品、服務可以介紹返俾客人，幫到個客之餘，從中學到嘅溝通、銷售、諮詢等技巧，對將來晉升之後帶領自己嘅團隊都相當有用。

換句話講，拉線師傅嘅工作其實好多元化；除咗技術支援仲可以學習到銷售服務技巧，只要你夠主動，抱住一個正面嘅心態，前面有無限嘅機會等住你！

【有趣事例】
「有次上咗個外國客人嘅屋企，可能見服務真係幾好嘅關係，裝完寬頻線之後佢好熱情咁叫我留低……（吓？！）一齊打機！（哦嚇死）咁我接完今日最後一單job又冇約咪留低打吓Online game囉，順便試埋條線上網係咪夠快吖嘛 😂」—— 網絡服務技術員阿Ken

「大公司文化：高層不知民間疾苦？」

部門嘅經理全部都係紅褲仔出身，又點會唔知前線員工嘅辛酸吖？所以呢條Team入面好多政策同福利嘅制定，都係為員工度身訂做。就好似呢排天口㷫，師傅要舟車勞頓咁周圍做嘢，公司就準備咗啲涼茶券慰勞大家喇，又有消暑風扇仔提供。

另外，Jacky以前做細嗰陣，就親身體驗過每日攞咁多架生出街有幾吃力，所以佢做咗經理之後，決定將啲工具寄存喺唔同區嘅速遞中心，從此之後，班師傅就過住幸福嘅日子…Sor…係唔使再拎住咁多重嘢周圍騰先啱！

一間大公司，其實都可以做到好有人情味、照顧同體恤員工。

「咁大間公司點維繫員工嘅關係？」

公司除咗有定期嘅飯局、聯誼球賽同義工活動，等員工可以聚埋一齊Update下最新資訊…部門中層有需要時仲會同前線嘅手足一齊做嘢，齊齊拍住上，拉近成條Team嘅距離！

「同行咁多選擇，做乜要入香港寬頻？」

返工除咗為錢，都要睇下公司入面嘅晉升機會同福利嘅！香港寬頻唔單止會為員工提供有關工作上嘅訓練，佢哋仲有個「下一站．大學」嘅計劃畀公司同事參加，名副其實供埋你讀大學呀！其實Jacky同Van都係好後生冇入大學就出嚟做嘢，之後透過呢個計劃由公司資助，幫佢地攞返張升做管理層嘅「入場券」～

好喇，再講返啲實際少少嘅…福利～最吸引嘅，一定係香港寬頻嘅假期比同行多好多，而大時大節員工都有多半日假，輪班嘅同事都會有補假～已經有家室嘅仲可以喺「親子日」帶埋小朋友返工，俾佢地見識吓爸爸媽咪嘅工作環境，仲可以識新朋友仔！

技術服務經理Van Leung：「與其用晒外判服務，不如著重聘用內部員工，建立自家強大可靠嘅工程團隊。」

「後記」

喺呢個年頭，入屋第一件事已經唔再係「叫人」，而係…搵Wifi呀！有冇諗過，你可以攤喺度好他調咁上網，係因為某一日，有個拉線師傅上咗嚟幫你駁好條線？

我哋喺日常生活入面，成日都會忽略咗班默默咁付出嘅前線工作人員。下次不妨同呢班勞苦功高嘅師傅講返聲：「辛苦晒～ お疲れ様～」（小編睇日劇睇上腦）

.　.　.

入嚟睇吓我地嘅搵工平台有咩唔同啦：
👉 http://wantedly.com/projects