想第一時間知道HelloReporter幾時請人?即刻click呢度再follow佢哋啦!
傳說中,世界上有班關公,佢哋專門負責為大大小小公司保持公司嘅聲譽同品牌形象,將釀成災難嘅風險減到最低(同時絕對唔好自己搞壇關公災難出嚟)。
今日,我哋會同你介紹呢個你聽過,但好少親眼見到嘅職業。有請HelloReporter嘅Co-founder & CEO Tim Chan,同埋PR & Content Manager Louisa Lau,為大家揭開呢行神秘嘅面紗!
「HelloReporter?即係同記者打交道?」
Er…啱少少啦!其實HelloReporter係一間新型嘅PR Agency,主要幫Startup做關公。Tim話:「除咗會搵唔同嘅傳媒出吓新聞稿,我哋亦都會應用Startup方法同埋新科技例如Chatbot呀A/B Testing呀等等去做宣傳;再加埋而家最Hit嘅Data Analytics, Automation去達到最好嘅效果。」簡單嚟講,傳統PR公司做嘅嘢,佢哋識做;人哋未做過嘅,佢哋都會第一個試做。
「同傳統PR Agency有咩唔同?」
做過4As嘅Louisa話:「大公司嘅行政架構相對複雜,啲Project大部份都要通過好多程序先出得街,亦都要經常參考以前啲Reference,作為公司入面嘅一粒小螺絲,想創新就比較難。」相反,佢喺HelloReporter嘅自由度高好多,由Brainstorm ideas、Pitch客、到執行,都可以自己話事,所以班員工都對自己嘅工作好有歸屬感同責任感㗎~
呢點相信都係好多社會新鮮人想入Startup做嘅原因 — 只要證明到自己嘅實力,其實老細好多時都會放手俾你去發揮。
「做Agency咪好忙囉?」
戴返個頭盔先,喺呢間公司做,要同時間跟至少五至六個客,都確實幾Chur~不過又咁講,雖然呢間公司嘅工作節奏好快,但學到嘅知識就好廣,亦會接觸到好多唔同嘅行業同範疇,真係十足十去咗少林寺咁呀。再加上老細同事們年紀相若,辛苦嘅時候有班啱傾嘅人同你一齊捱,有個靚仔/靚女同事拖住你一起衝去終點(FF吓好喇你),夫復何求!
「請Junior位啫…係咪聽教聽話就得?」
雖然Co-founder有成十年PR經驗,但Tim本身並唔係行內人,所以好多時都想用新方法去做舊嘅PR事,總之就Common Sense行先。佢好希望班同事同佢一樣,主動試多啲唔同嘅新嘢,所以特登買咗個Skillshare (Online Learning Platform) 同班員工開心些牙!Tim又話,如果唔係大吉利是有大鑊嘢,基本上公司嘅大部分決策,都係交畀員工揸主意,所以佢請得嘅人,一定要有能力同Common Sense去自己解決問題~同埋,一定一定要鐘意試新嘢啊!
「咦…做乜全部同事都踢拖返工嘅?」
見到啲員工個個都著住拖鞋…唔通…你哋真係忙到當咗呢度係屋企?
Tim即刻衝出嚟,話只係想班同事返工返得輕鬆啲,先叫佢哋除鞋啫~Louisa仲話,老闆為咗營造個舒適嘅工作環境,會全天候播歌畀大家聽…吖,望住你哋Un Un腳咁做嘢,Chur得嚟又幾Chill喎~返工唔駛日日著住老西加皮鞋/高踭鞋之餘,仲可以解放腳趾,正!(腳臭者請自重)
「講多無謂,福利最實際!」
返工有歌聽只係基本嘢…真正嘅福利…係OT完第二日可以瞓到自然醒先返工、老細個Netflix Account已經隨時處於Log-in咗嘅狀態畀同事睇、公司有無限量嘅零食同酒精供應(可以對住老闆唱返句「你把我灌醉~」)、新年有Bitcoin做利是、世界盃期間有上門按摩服務…What?喺公司按摩?小編冇聽錯,你都冇眼花呀,就好似《The Intern》咁!Tim話知道大家睇波睇到攰,要幫大家舒解疲勞喎…Ok you win~
「後記」
其實做PR呢一行辛苦就梗㗎喇,但有啲人就係鍾意嗰種工作快又多元化嘅新鮮感,對不同嘅公司有不同嘅做事方法,好啱短時間內想學到好多嘢嘅年輕人(特別係對Startup有興趣或過幾年想創業的!)。
P.S. HelloReporter真係好需要Designer呀