想第一時間知道Hong Kong Broadband Network幾時請人？即刻click呢度再follow佢哋啦！

唔好以為sales就一定係喺舖頭做前線，今日就搵嚟HKBN 企業方案Sales Team嘅Mingo Tsang同Ray Lam…畀多啲指導你哋，一齊分享做sales嘅樂趣！

「要Sell啲咩人？」

呢條team主要係將商業寬頻呀、話音呀、雲端服務呀、流動通訊呀、Wi-Fi方案呀等等唔同嘅通訊科技產品同埋企業方案，sell畀各行各業嘅商業客戶，配合佢哋嘅電訊服務需求，等佢哋可以時刻同客戶連繫，更加容易做生意。

「有冇咁多客要Sell呀？」

你是但行入一幢商廈，數下個水牌有幾多間公司，或者喺條街度睇下有幾多舖，就知呢行嘅market有幾大㗎喇～皆因無論係大公司定細公司，無論咩行業都好，都至少總要有一兩樣電訊產品先可以運作到。當然，每一次sell客時，根據佢哋嘅實際需要度身訂造一個啱用嘅plan，咁就更加無往而不利啦；加上HKBN喺呢幾年不斷擴充規模同發展業務，越嚟越多產品可以賣…換句話講，即係大家搵錢機會多咗，條team又好吃香咁囉。

「放假都要見客？」

星期一至五已經日日都見客㗎啦，星期六、日都仲要對住佢哋，唔好喇啩？唔使驚住，講緊嘅「見客」，其實只係同班啱咀型嘅客，放假約埋一齊去玩啫～

Ray話：「平時出去開會見嘅客好多都係IT人，而自己又係做呢行，傾吓傾吓就會好快熟落～所以得閒就會一齊去行下展覽，了解最新業界資訊，有唔少仲friend到會約埋一齊去跑步同行山添！」

「跑唔到數實畀人捽啦！」

做得sales，話唔使跑數就呃你嘅！但呢條team唔會好似其他公司咁，一嚟就開同事波，相反會透過傾偈了解下開唔夠單嘅原因～

喺HKBN做咗七年有多，由MT開始做到帶領住一大條team 嘅Mingo指：「如果同事係有愛情、家庭、朋友等等嘅私人問題困身，會同佢傾下有咩方法解決，睇下有無嘢幫到手；如果係銷售技巧、個人態度呢啲影響到工作表現，就會派個leader同佢一齊見客，之後再畀返相應嘅建議，幫助同事去提升成功機會；如果只係因為對產品嘅認識唔夠，公司亦會有support畀你。」啫係一句講晒，公司會全方位360度無死角咁幫你手解決問題！

「返工＝自己生意！」

Mingo同Ray話佢哋會一邊返工，一邊搞自己生意…哦！你哋秘撈…講下咋，其實係公司有個共同持股計劃（Co-Ownership Plan），邀請同事選擇係唔係將一部分人工投資落公司，如果到咗共同目標，公司就會俾返你相應嘅回報，實行齊齊同公司拍住上。公司做得好，股價自然上，佢哋自然又可以賺更多，咁班同事除咗自己份糧同佣，就可以有額外嘅回報喇！（問到回報賺咗幾多時，佢兩個都笑住話：「唔少㗎～」）

Sales呢個行業本身就係做得多賺得多，而呢個計劃正正可以提供一個平台同資源，令到同事對自己嘅工作更加上心，同公司目標一致，睇嘅嘢就更加長遠…如果肯畀心機去做嘅，自然有前途，又有錢途啦！

「唔使返Office做嘢咁Free？」

喺度做嘢返工放工都唔使打卡，下晝出去見完客又唔會有人逼你返公司，上司又唔會長期mon實你…都真係幾free㗎！不過，呢啲嘢都係建基於員工嘅自律同埋責任感嘅，加上每個sales都有自己嘅目標要跑，就好似自己經營緊一盤生意咁，無可能唔落力，咁仲使咩下下check住晒喎，有時間都不如等啲同事喺出面見多一兩個客好過啦～

「把口係咪要𠺘過油先做得？」

吹得嘅人喺sell人方面固然著數啲啦，但內斂嘅又未必會蝕底嘅，Ray就話：「有個同事平時唔多出聲，但個人又細心又有條理，所有細節都跟到好足，試過同客人面都唔使見，就已經成功透過email同電話開單啦！」完美示範咩叫唔聲唔聲，嚇你一驚。

佢話與其喺present嘅時候講到天花龍鳳，不如踏實啲take action仲更加實際，如果跟得好，客人隨時仲會將你介紹畀其他公司㗎，咁生意就愈來愈多啦。

「冇經驗？使乜驚呀！」

你可能會諗：冇做過電訊業，對B2B冇乜認識，又唔係做sales出身，咁實唔請啦…

Mingo都好老實咁話有相關對企業客戶經驗，的確會優先考慮嘅，不過如果你對呢行有興趣，想獨立工作又想搵多啲錢，即使無電訊底其實都適合加入呢條team～只要你肯學肯做，都唔難上手！事關公司會為新入職嘅同事進行兩個禮拜嘅product training、上司同 Solution Consultant 又會陪你一齊見客，等你學識多啲技術層面嘅嘢，時不時又有top sales些牙自己嘅開單技巧，所以唔使驚，you are not alone～

「後記」

小編聽完Mingo同Ray介紹佢哋條Team，唔知點成個腦都係「一二三四五六七，多勞多得」～（黑人問號）

.　.　.

睇吓有咩好工啱你啦 👉 http://wantedly.com/projects

成立於2010年，Wantedly是一家於東京起家的上市企業 。我們的目標為"Create a world where work drives passion" — 以才能及對公司的興趣將求職者與僱主連繫起來，取代重視利益關係的傳統配對。在日本有超過27,000間公司使用Wantedly，每月活躍用戶達到250萬個。我們的服務已拓展至新加坡，現在更進駐香港！