/assets/images/5468163/original/f630768d-703e-40ee-8319-8217abbfca3c?1598601853)
撰文：Wantedly編集部
各位鍾意去旅行嘅朋友對旅遊體驗預訂平台Klook肯定唔陌生！Klook喺2014年成立，短短4年內已經發展到全球有超過800個員工。到底想喺旅遊體驗預訂平台返工係咪淨係鍾意去旅行就得？我地請嚟Klook嘅3位員工同大家分享一下！
由Startup發展到有超過800人嘅跨國公司
近年越嚟越多人鍾意快閃旅行，Klook係港人好熟悉嘅平台之一。透過Klook，你可以搵到世界各地嘅景點資訊，仲有得一站式訂晒景點門票、local tour加交通等等，真係超方便！
Klook成立至今只係短短4年，已經喺全球擁有16個辦公室及超過800名員工，過去融資超過3億美金，係旅遊活動領域融資金額最高嘅公司。Klook一班管理團隊認為旅遊行業係國際性嘅，所以都好努力擴充業務，除咗鞏固亞洲市場之外，最近仲擴展埋歐洲同美國市場。
到底Klook點解可以發展得咁快？首先就由人力資源高級總監Cary Shek為大家拆解。Cary認為公司可以發展到今日嘅規模，主要係有一班擁有共同目標，又好勇於創新嘅同事。公司同時致力為同事提供開放、自由嘅工作環境，希望激發佢地嘅靈感！
▲ 相信鍾意旅行嘅香港人都會認識Klook，但喺Klook入面返工嘅事你又知幾多呢？
團體精神最重要
Cary指公司團隊發展得好快，所以請人時都會留意求職者係咪有團隊精神同國際視野。加上Klook喺多個國家開展業務，有好多跨團體，甚至係跨國家嘅合作機會，Cary都希望同事可以「Work As One Team」。佢話：「我地嘅業務已經擴展到歐美市場，所以有好多國際性合作。」求職者都要有全球化思維，助公司打入國際市場，未來仲有機會去世界各地做嘢㗎！
仲有咩人會吸引到HR嘅眼球？Cary就話有創業家精神、創新嘅諗法去幫助公司拓展業務，Klook亦十分歡迎唔同文化背景同國籍嘅人黎加入。當然都要緊貼潮流，如果唔係點提供最新、最好玩嘅旅遊景點俾用家呢？
佢再補充：「因為Klook發展得相當之快，所以我地都希望有Passion嘅人才加入同公司一齊成長。」佢仲鼓勵同事唔好怕提出意見，寧願不斷去嘗試，唔work就再改，有幾多年經驗都唔係重點！
▲ 人力資源高級總監Cary話同事最好有好強嘅企業家精神！
每個人都有自己嘅存在價值
好似今年啱啱畢業嘅合作夥伴及活動助理Bianca Yeung，佢本身好鍾意去旅行，又對市場營銷相當有興趣，所以就選擇咗入Klook。佢主要工作係同各方伙伴，例如各大航空公司、銀行同埋旅遊局商討合作機會。Bianca話只係做咗短短三個月，已經見識到好多嘢，比起每日重覆又重覆嘅工種開心得多，仲話以後唔驚星期一要返工！
而任職高級產品經理嘅Vincent So，畢業後投身金融行業先發現呢樣並唔係佢所追求嘅嘢。佢話：「傳統企業係一個好好嘅平台令你去成長，但工作上帶來嘅滿足感就未必有呢度咁高...感覺上喺年輕又發展快嘅公司入面，每個人都有自己嘅存在價值！」Vincent投身Klook嘅第二個原因，係希望成為建立國際知名嘅香港獨角獸公司嘅團隊之一。
佢而家嘅工作首先要了解用家需要，再同各部門開會合力去改進Klook平台。最近佢仲幫公司搞「WhatsApp Business」，用家可以透過通訊軟件即時收到自己嘅訂單資料，Klook仲係亞太區頭幾間推出呢個服務嘅公司！
▲ （左起）人力資源高級總監Cary Shek；合作夥伴及活動助理Bianca Yeung；高級產品經理Vincent So
個平台好用到連阿媽都識用
對於喺呢度返工最滿足嘅事，Vincent就話係阿媽都用佢有份設計嘅平台！「我阿媽都唔後生，但當佢都話易用真係好大嘅鼓舞！」
Bianca同Vincent異口同聲表示Klook發展比佢地預期中快，每個月都不停擴展業務。Vincent仲話工作中令人最享受係全部同事都好勁，成日可以偷師。「好多人以前都做過大Startup，啲嘢一講就明，每日都好有新鮮感！」
一間公司最重要係「人」
到底Klook有咩魅力令啲同事咁盡力為公司呢？Cary就話佢地好著重員工福利，甚至有團隊專門關注員工嘅身心健康、積極聆聽團隊嘅需要，再而將Klook文化傳播到全球各個Office。例如喺香港，佢地定期提供瑜珈同HIIT課程俾員工放鬆下，work-life balance絕對唔係得個講字。
▲ 放工後喺辦公室做瑜珈，放鬆一下～
Klook好強調有活力嘅工作氣氛，辦公室除咗有大量自由空間開會，仲會一直播音樂，最正嘅係員工可以帶寵物返工，每日都係pet day！
