撰文：Wantedly編集部

✨ 想即刻搵份新工？睇吓Wantedly有咩啱自己啦！✨

喺香港，有一套成功方程式：入大學，搵份好工，三十歲結婚生b，捱到六十歲，跟手退休嘆世界，咁就成世人。聽落好似舒服又理想，但如果齋睇份糧，每朝返工都好似《屍殺列車》咁好咩？

作為一個/Slasher/，Zoe Chan就認為：「只要你做人有原則，肯接受挑戰，對工作有熱誠，咁就已經好成功！」

成/slash/之路

Zoe而家貴為normalchic.com嘅創辦人, PR公司NCbubble Communications嘅老闆，個人身份又係一個KOL，可以話係「周身刀，張張利」。

但喺／成功／之前，佢其實走左一段雖然唔算迂迴，但遙遠嘅路。Zoe中六嘅時候已經開始寫blog，當時根本未有KOL呢個職業，但佢早就開始成為一個blogger／influencer，寫吓一啲關於衣著同化妝嘅tips同見解。

▲ 「一開頭都係為興趣㗎咋，覺得靚咪post囉。」

當Zoe入到去大學嘅時候，就索性唔喺當時嘅個人blog出文，而開始左normalchic.com。結果一寫，就寫到而家：「嗰陣時讀大學都唔係咁忙，咪喺課餘時間寫下嘢囉，其實冇諗過話而家會有KOL呢個職業，更加冇諗過會有咁多人支持。」

誰不知Zoe嫌自己每日返學寫字都唔夠忙，仲要去做埋part time同intern：「當年讀書嘅時候好好彩，一開始就入到去Valentino做PR，仲連拍賣行嘅PR都做過。冇㗎，咁我咩都想試，想學呀嘛。」

皆因喺Zoe嘅世界裡面，讀書雖然重要，但社會經驗更緊要：「無論你做邊行都好，待人接物都係crucial，尤其是我而家做緊嘅工作。所以我讀U嘅時候，最起碼因為part time而認識到唔同嘅人，知道人哋嘅運作係點。」但到頭來，真正令到佢跳出嚟成為一個slasher嘅，係佢第一個老闆同佢講嘅一句說話。

Slasher’s DNA？

可能大家睇落會覺得，Zoe好似生出嚟就係做呢行，其實／成功／嘅背後，係佢累積嘅嘗試同社會經驗：「我好細個就已經學drama，所以我從來都唔驚對住一班人present或者上台講嘢，亦因為咁，我就知道自己應該循住呢個方向行。」

就係因為Zoe由細個到大學，經已面對過自己，接觸過職場，所以佢一畢業就已經係Sidefame做fashion buyer，可以話係平步青雲：「公司當時畀好多機會我，而我好快就已經可以去啲大型嘅event，好似巴黎嘅fashion week咁。但嗰陣我試過成個月返朝9晚9，連屋企人都見唔到，搞到自己好辛苦。」與此同時，Zoe當時嘅老闆同佢講左一句說話，令佢struggle左幾個月之後，就決定左要辭職。

▲ 「所有野都係opportunity cost，你而家先廿歲頭，你有咩loss啫？」

講到呢度嘅時候，Zoe仲笑住話：「可能老闆都冇諗過，呢句說話會對我有咁大影響，而就係因為佢講左呢句說話，我就決定左要自己出嚟做一個slasher。」於是，剛開始slasher生活嘅Zoe一邊寫文，一邊幫學生補習，一邊喺佢個網站上面搞e-commerce：「個網店其實就係一個fashion website，上面會有好多唔同嘅article，而讀者就可以係我個網買衫，咁我就會分到一部分嘅commission。但因為賺得唔多，所以weekend咪去做補習幫補下囉。」

正當Zoe嘅知名度越嚟越高，接嘅job都越嚟越多嘅時候，佢竟然選擇左開佢嘅PR公司同production house：「雖然當時KOL呢個風氣開始盛行，但我根本唔知佢會last幾耐，而我都覺得自己未必可以keep住做一個top-tier嘅KOL。所以就開始左自己嘅business。」

試還試，都需要學識選擇

寫blog、做KOL、開公司，全部都係嘗試，但其實Zoe一開始同普通嘅後生仔一樣，都係咁大壓力：「我一開始start呢間公司其實同我做influencer一樣，有時會接到個job，有時就會輸畀人。其實我到而家都會諗，究竟係咪我唔夠人好呢？係咪唔夠人叻呢？點解會爭輸畀人呢？」筆者聽落其實同大家搵工見工一樣，點解有時見工會衰咗，又或者連interview嘅機會都冇，但Zoe而家就有另一個睇法。

▲ 「其實人地有嘅嘢我冇，但我有嘅野人地都冇。」

於是乎，得出嚟嘅結論就係：呢個世界係公平嘅，好少會有長勝將軍。對Zoe嚟講，心理質素好緊要：「最重要係你要接受到失敗嗰下，仲要從中learn a lesson，而我做得最大嘅改變就係『選擇』。以前打工你根本冇得揀：O唔OT你冇得揀，接唔接呢個客你都冇得揀。但而家就算我去傾一個deal，就算我衰咗都好，呢個都係我嘅選擇同自由。」

媽媽／自己／爸爸

喺訪談期間，Zoe忽然諗返起當年做選擇嗰陣，如何係爸爸媽媽呢兩極下搵到自己：「爸爸係穩陣派，會叫我唔好辭職，因為當年間公司對我好好，畀好多機會我；而媽媽就係冒險派，會支持我去試左先，唔得嘅最多咪又返去打工。」喺兩者之間，Zoe選擇左「離棄」爸爸，除左因為自己真係想闖下之外，仲因為佢喺「me time」裡面搵到自己。

▲ 「除左要知道自己鍾意啲乜野，仲要知道自己強項係啲乜野，知道自己想追嘅係啲咩。」

尋找同面對自己嘅過程好漫長，尤其是後生嗰陣，但無論你係打工還是自己start一個business都好，都要諗清楚究竟自己適合做啲咩，想做啲咩。如果諗唔掂嘅，咁咪試囉，試左你就知自己得唔得。

Zoe喺訪談期間，一直都好強調「試」，佢一直都好相信「you’ll never know」，就好似佢一路走來嘅經歷咁：「一開始我都唔知原來學drama、睇靚衫係會有用，因為人生本來就係咁，有啲嘢係你plan左，有啲嘢唔係，但somehow去到最後你就會發現所有野嘅sum up就係你『自己』。」

「所以仲後生嘅時候，咪咩都做左先囉，因為你唔試，就永遠都唔會有opportunity。」

入嚟睇吓我地嘅搵工平台有咩唔同啦：
👉 http://wantedly.com/projects