一年容易又聖誕，假就人人都有得放，但Christmas party就唔係人人都要搞，有苦自己知啦……一個唔覺意搞衰左，又話要跟啲咩「復古造型」呀……到時去嘅又辛苦，搞嗰班又唔開心，都唔知為乜。與其係咁，不如公司人頭派幾舊水，大家各自各精彩算啦。

但奇怪既係，十間公司裡面有九間死都要搞呢個party，唔知係為左迎合消費主義吖，定還是想畀啲額外嘅員工福利畀大家呢？

筆者都相信老闆們想啲staff有個Merry Christmas嘅，但話哂都係老闆荷包，如果洗完筆錢，大家都唔開高興，HR同Social Committee班同事又好似無啦啦搞多咗個event咁，分分鐘衰過秋季大旅行。但既然都係想班同事開開心心過返晚，不如諗下點樣搞好佢罷啦。

非「酒」不可？

出左嚟做嘢之後，總會離不開酒精，姑勿論食飯應酬也好，同同事收工吹下水也罷，點都會去搵個地方坐低飲杯嘢。好酒之人當然來者不拒，但公司上上下下咁多員工，總有人唔飲酒或者唔飲得。

話說筆者當年去過嘅其中一個party，本來簡簡單單食餐飯就完，誰不知老闆興起，就請大家去蘭桂坊嘅一間樓上bar飲嘢。唔去呢，就等於唔畀面老闆，理得你飲唔飲得，咁唯有避得就避啦，但玩起game上嚟，你又走得幾多數呀……雖然「曾經畢竟只是曾經」，但係瞓醒見到group上面嘅相同片，都足以成為「年度笑柄」，就算有partition都搞唔掂。

歸根究底，有酒還是冇酒好？冇錯，飲少少酒的確係會令大家都放鬆啲，講嘢都講得放啲。但係酒能亂性，以筆者角度梗係冇酒好啦，可能你會話：超，你都唔飲咁實係㗎，全世界就哂你囉。

試下退一萬步諗，Christmas party都係想成間公司開開心心過返晚，暫且擺低工作上嘅煩惱，而有咗呢個大前提之後，酒其實係咪必需呢？飲到興起嘅時候，唔飲酒嘅同事又係咪真係唔洗飲呢？又要唔提供酒精，但又要畀酒某啲staff飲，大家有冇考慮過mocktail呀？只要大家都有杯嘢飲係手，睇落又好似飲緊酒咁，似有還無有時更誘人。

食食呀食食懵你

做HR嘅，又要負責請人，又要負責埋d admin嘢，如果連book邊間餐廳，食咩菜式都要做埋人口普查的話，順得哥情就失嫂意，真係三頭六臂都拆唔掂。通常呢個時候點呀？自助餐囉，鍾意食咩自己拎，中、日、意、法、韓……各地佳麗任君選擇。但公司搞party，是但搵間酒店人頭都要成千蚊啦，閒閒地廿幾三十個人，又有冇咁多老闆咁疏爽先？

家陣最方便條「橋」冇咗，咁點算呢？唔通真係走去買廿個Chef Nic返公司，大家一齊笑下個「燒味」唔係「燒味」味，咬完就算咩？

既然自己搞唔掂，咪卸返個膊畀人囉。其實，外國好興potluck party，土炮啲講即係BYOF（bring your own food）。顧名思義，每個人都要預備一樣食物，話你知去買去煮去偷（溫馨提示：仲有外賣app），總言之人到禮到。一嚟大家都會有啱食嘅嘢，二嚟又可以試試班staff對大家幾「有心」，一雞兩味。

如果大家真係想試下potluck嘅，記得畀定個budget大家，好似每人包幾百蚊利是咁（用剩嘅咪當員工福利囉），費時等陣搞掂哂啲嘢食最後claim唔到錢，就盞尷尬啦……

當嘢食同嘢飲嘅問題都好似解決哂嘅時候，仲有場地呀、啲娛樂環節又點算呢？筆者都要入洗手間度度先……

下回 ⏩

睇吓Wantedly有咩好工啱你啦 👇🏼

https://www.wantedly.com/projects