試冇錯係要試,但都要有方向咁去試㗎嘛,如果「盲摸摸」咁試法,真係唔知幾時先會搵到份啱心水嘅工。當筆者意識到呢件事之後,就決定換吓個思考模式,嘗試將事情諗得簡單啲:
唔知道自己想做咩工種、industry,其實係好正常。既然係咁,就唔好諗得咁深入住,因為你一定會知自己唔鍾意啲咩,又鍾意做咩嘢!
於是乎,好快就會得出一個表,以筆者為例:唔鍾意坐死喺office、鍾意時不時要離開office做嘢;唔鍾意日日都對住啲spreadsheets、鍾意影相寫嘢;打死都唔做政府工……
筆者係呢個時候諗嘅嘢會practical啲,例如返工有得聽歌、著衫唔使咁formal之類都唔會寫落個表,事關呢啲好處只會當你見完工,甚至你入職之後先知道,所以大家都應該諗得實際啲,盡量會喺job description就見到嘅就最好。
當呢個表成型之後,搵工就開始有個方向,需要做嘅只係睇吓每一份工tick到個表上面幾多格,然後再決定apply邊份工。